उचित समयमा पानी र हिमपात : हिउँदे खेती फस्टाउने किसानको अपेक्षा

चन्द्र प्रसाद भाट,माघ २४,अछाम । यसपाली समय समयमा पानी पर्नेक्रम जारी भएपछि अछामका किसानहरु हिउँदे खेति फस्टाउने भन्दै हर्षित भएका छन । विगतका बर्षहरुमा पानी अभाबका कारण किसानहरुले लगाएको हिउँदेबाली सुक्ने अवस्थामा पुगेको स्मरण गर्दै किसानहरु यसपाली भने हिउँदे बालीलाई आवश्यक पर्ने पानी प्रयाप्त मात्रामा पुगेकाले यस बर्षको हिउँदे बाली फस्टाउने आसामा अछामका किसानहरु बसेका छन ।

पानीको पहुँच कम रहेका जमिनहरुमा पनि यसबर्ष खेति फस्टाउने क्रममा छ । पटक पटकको बर्षातले आफु लगाएत अन्य किसानहरुले लगाएका हिउँदे बालीबाट प्रयाप्त मात्रामा उब्जनी हुने भन्दै मंगलसेन नगरपालिका वडा नः ७ का अगुवा कृषक दुर्गा प्रसाद ढुंगानाले खुसि ब्यक्त गर्नुभयो ।

आफु लगाएत अन्य किसान दाजुभाईहरुले लगाएको हिँउदे बाली तथा तरकारी खेतिलाई समय समयमा भएको बर्षाका कारण फाईदा पुग्ने र उत्पादन पनि बिगतका बर्ष भन्दा बढि नै हुने भन्दै ढुंगानाले खुसि ब्यक्त गरेका हुन ।

उनले भने,पहिलेका बर्षहरुमा पानी अभावका कारण खेतीबाली,तरकारी खेति,फलफुल खेति सुकेर नष्ट हुन्थ्यो,अहिले प्रयाप्त मात्रामा पानी परिरहेकाले उत्पादन पनि बृद्धि हुने देखिन्छ ।

यसमा किसानहरुलाई थप कृषि पेशामा आकर्षित बनाउनका लागी स्थानिय सरकार र कृषि ज्ञान केन्द्र अछामले सहयोग गर्नुपर्नेमा उहाँले जोड दिनुभयो ।

यस्तै मंगलसेन नगरपालिका वडा नः ६ का किसान देवि प्रसाद भण्डारीले यस बर्षको लगातारको बर्षाले किसानहरुलाई ठुलो राहात पुगेको बताउनुभयो । विगतका बर्षहरुमा पानीको अभावमा सुकेर जाने किसानहरुको अन्नबाली यस बर्षभने प्रयाप्त पानीका कारण अन्नबाली तथा तरकारी खेतिको उत्पादन पनि बृद्धि हुने उहाँको भनाई छ ।

माघ महिनाको अन्तिम साता उच्च पहाडी तथा हिमाली भेगमा भएको हिमपात र बेसितिर परेको बर्षातको पानीले किसानहरुलाई थप राहात महसुस भएको भण्डारीको भनाई छ ।

अहिले भएको अत्यधिक हिमपात र बर्षातका कारण आफुले लगाएको अन्नबाली उत्पादनमा बृद्धि हुने उहाँले अपेक्षा गर्नुभयो । अबको २/३ महिनासम्म पनि बर्षा नभएपनि हिँउदे खेतिलाई त्यति असर नपर्ने उनको अनुमान छ ।