उद्धममा जोड दिनसके आर्थिक समृद्धि हुन्छ : कार्यबाहक प्रमुख कुँवर

१६ बैशाख , अछाम : कमलबजार नगरपालिकाका कार्यवाहक नगर प्रमुख शारदा कुमारी बिष्ट कुँवरले उद्धममा जोड दिई आत्मनिर्भर बन्नुपर्ने बताउनुभएको छ । शनिबार वडा न ५ कुइकामा व्यवशायिक सचेतना तथा लैंगिक समानता सम्बन्धि आयोजना गरिएको ८ दिने अभिमुखिकरण कार्यक्रमको समापन गर्ने क्रममा उहाँले यस्तो बताउनुभएको हो ।

हरेक व्यक्ति स्वरोजगार भई आत्मनिर्भर बन्नसके आर्थिक समृद्धिमा टेवा पुग्ने कुँवरको भनाइ छ । तालीममा सिकेका कुराहरूलाइ आफ्नो दैनिक जीवनमा लागु गरि स्वरोजगार बन्न उहाँले आग्रह गर्नुभयो ।

विभिन्न सिपमुलक व्यवशायिक योजना छनौट गरि उद्धममा आवद्ध हुन सहभागिलाइ आग्रह गर्नुभयो । नगरपालिकाको उद्धम विकास शाखाको आयोजनामा भएको कार्यक्रम बैशाख ९ गतेबाट १६ गतेसम्म संचालन भएको थियो ।

कार्यक्रम समापनमा प्रमुख अतिथि रहनुभएकी कुँवरले नगरपालिकाका १० वटै वडाका सिपमुलक कार्यक्रममा सहभागी हुन चाहने उद्धमीहरूको लागि नगरपालिकाले पुर्ण सहयोग गर्ने प्रतिबद्धता जनाउनुभयो ।

पछिल्लो समय दैनिक रूपमा सयौंको संख्यामा युवा/युवतीहरू बिदेश पलायन भईरहेको अवस्थामा उनिहरूलाइ स्वदेशमै रोजगारी सिर्जना गरि विदेश पलायनबाट रोक्न राज्यका ३ वटै तहका सरकार जिम्मेवार बन्नुपर्ने बताइन् ।

सिलाइकटाइ, तरकारी खेती, पशुपालन लगायतका अन्य स्वरोजगारमुखी कार्यक्रममा सबै स्थानीयलाई जोड्न नगरपालिकाले पहल गर्ने उहाँको भनाइ छ ।

वडातह देखि नगरपालिका कार्यालय सम्मले उद्धमका कार्यक्रमलाई निरन्तरता दिन पहल गर्ने भन्दै आफ्नो बाँझो रहेको जमिन उपयोग गरि आत्मनिर्भर बन्न सुझाव दिनुभयो ।