तुर्माखाँदमा विषेशज्ञ सेवा सहितको स्वास्थ्य शिविर सञ्चालन हुँदै

चन्द्र प्रसाद भाट, २२ फागुन, अछाम : अछामको तुर्माखाँद गाउँपालिकाले २ दिने निशुल्क स्वास्थ्य शिविरको आयोजना गर्ने भएको छ । जिल्लाकै विकट रहेको तुर्माखाँद गाउँपालिकाका नागरिकहरूलाई गाउँमै सेवा दिने उद्देश्यले शिविरको आयोजना गर्न लागिएको गाउँपालिकाका अध्यक्ष डम्बर बहादुर बिसीले जानकारी दिए । 

सामान्य स्वास्थ्य जाँच गराउन जिल्ला अस्पताल मंगलसेन, सुर्खेत जिल्ला सम्म जानुपर्ने बाध्यता रहेको भन्दै गाउँपालिकाले आधारभूत स्वास्थ्य सेवा शिविर मार्फत गाउँघरमै दिन लागेको अध्यक्ष बिसीले फरक खबरसँग बताए । 
तुर्माखाँद गाउँपालिका अछामको सहयोगमा स्वास्थ्य कार्यालय अछामको समन्वयमा स्वास्थ्य निर्देशनालय दिपायल डोटीको आयोजनामा शिविर सञ्चालन गर्न लागिएको पालिकाका प्रमुख प्रशासकीय अधिकृत लोक बहादुर शाहीद्वारा हस्ताक्षरित सूचनामा जनाइएको छ । 

यही फागुन २९ र ३० गते २ दिन कालिकेश्वरी माध्यामिक विद्यालयमा सेवा प्रदान गरिने गाउँपालिकाले जनाएको छ । बिहान १० बजेदेखि उपचार सेवा सुरु हुने भएकाले समयमै उपस्थित भई आफ्नो स्वास्थ्य जाँच गराउन आग्रह गरिएको प्रशासकीय अधिकृत शाहीले बताए । 

शिविरमा जनरल फिजिसियन, स्त्री रोग, बालरोग, दन्तरोग, नाक, कान, घाँटी, शल्य चिकित्सा, हाडजोर्नी तथा नसारोग, छालारोग, मानसिक रोगको उपचार विशेषज्ञ स्वास्थ्यकर्मीहरूद्धारा गरिने पनि पालिकाले जनाएको छ । 

साथै रेडियोलोजिस्ट तथा भिडियो एक्सरे सेवा, इसिजी , पिटिए, प्रयोगशाला सेवा, आयुर्वेद सेवा तथा आँखा परीक्षण, परिवार नियोजन, महिलाहरूको पाठेघरको मुखको क्यान्सर परीक्षण सेवा समेत दिइने छ ।

शिविरमा सहभागी भई ढुक्क तरिकाले आफ्नो स्वास्थ्यमा भएका समस्याहरू चिकित्सकहरूलाई जानकारी दिई समयमै उपचार गर्न सबै पालिका बासिलाई आग्रह गरिएको छ ।