विनोद शाहीको न्यायका लागी प्रशासन घेराउ देखि अनसन सम्मका कार्यक्रम सार्वजनिक

सुदूर संम्वाददाता,जेष्ठ ३१ अछाम । गत जेष्ठ १७ गते राति वेपत्ता पारीएका पञ्चदेवल बिनायक नगरपालिका वडा नः ४ कालिकास्थानका १६ वर्षिया किशोर विनोद शाहीको न्यायका लागी भन्दै नगरका मुख्य ४ दलले फेरी संयुक्त विज्ञप्ती जारी गरेका छन ।

विनोदको हत्यामा संलग्न भन्दै मृतकका आफन्तले जिल्ला प्रहरी कार्यालयमा किटानी जाहेरी दर्ता गराएका भएपनि जाहेरी दर्ता भएको ६ करीब १ हप्ता बितिसक्दा पनि आरोपितलाई पक्राउ नगरेको भन्दै न्यायका लागी थप आन्दोलनका कार्यक्रमहरु घोषणा सहित दलहरुले बिज्ञप्ती जारी गरेका हुन ।

नेकपा एमाले नगरकमिटिका ईन्चार्ज भिम बहादुर बिस्ट,नेकपा माओबादीका जिल्ला सचिवालय सदस्य तथा नगर अध्यक्ष अमर बिक,नेकपा एसका जिल्ला कमिटि सदस्य बिरेन्द्र शाही र नेकपाका नगर ईन्चार्ज सर्जन धामीद्धारा हस्ताक्षरीत संयुक्त बिज्ञप्तीमा आरोपितलाई तत्काल पक्राउ गरि कारबाहिको प्रक्रिया सुरु नगरे चरणबद्ध आन्दोलन गर्ने चेतावनी दिइएको छ । किटानी जाहेरीमा उल्लेख गरिएका आरोपितलाई पक्राउ नगरे थप आन्दोलन गर्ने चेतावनी दलहरुले दिएका हुन ।

यस्तै उक्त ४ दलले यहि असार २ गते विरोध र्याली गर्ने,३ गते जिल्ला प्रशासन कार्यालय घेराउ गर्ने,४ गते जिल्ला प्रशासन कार्यालयमा अनसन सुरु गर्ने र ५ गते सिटि र्याली गर्ने लगाएतका आन्दोलनका कार्यक्रमहरु घोषणा गरिएका छन । घटना भएको यति समय भैसक्दा पनि आरोपितलाई नियन्त्रणमा लिन नसकेको भन्दै स्थानियले प्रहरीको कार्यक्षमता माथि प्रश्न उठाउनुका साथै न्याय पाउने कुरामा पनि शंका गर्न थालेका छन । आफ्ना मागहरु पुरा नभए बिभिन्न आन्दोलनका कार्यक्रमहरु गरिने र त्यसबाट पर्न जाने असरको जिम्मा जिल्ला प्रशासन,जिल्ला प्रहरी र सरकारले लिनुपर्ने पनि दलहरुले बताएका छन ।