केदारनाथ मेला कार्तिक २८ गते लाग्ने : समितिको अध्यक्षमा जैशी

अछामको कमलबजार नगरपालिका वडा नम्बर ७ जामामा लाग्ने केदारनाथ मेला सम्पन्न गर्न मेला व्यवस्थापन समिति गठन गरिएको छ। महेशप्रसाद जैसीको अध्यक्षतामा समिति गठन गरिएको हो। कार्तिक शुक्ल पञ्चमीदेखि चतुर्दशीसम्म लगातार १० दिन चल्ने मेलालाई सफलतापूर्वक सम्पन्न गर्नका लागि जैसीको संयोजकत्वमा मेला व्यवस्थापन समिति गठन गरिएको हो।

यस वर्ष केदारनाथको मेला तिथि घटबडका कारण कार्तिक २८ गते नै हुने भएको छ। कार्तिक २८ गते केदारनाथ र छडाल देवताले खला नाच्ने र २९ गते केदार माडुमा आज पूजासहित होम गरिने जामाका स्थानीय युवा भीम खतिवडाले फरक खबरलाई जानकारी दिनुभयो ।

पूर्वी अछामको अन्तिम मेला पनि केदारनाथको मेला नै भएकाले यसको महत्त्व अझ बढी रहेको पाइन्छ। लगातार १० दिनसम्म दुवै देवताले धेवल लगाएर त्रयोदशीका दिन छडाल देवताले तीन तलामाथिबाट खसालेको पानी खानुका साथै बाघ र बिरालोको रुपमा नाच्ने गर्दछन् ।
छडाल देवताको पूजा भने कार्तिक ३० गते पूर्णिमाको दिन हुने बताइएको छ । डोटेली संस्कृतिमा आधारित अछामको एकमात्र मेला भएकाले मेला भर्न छिमेकी जिल्ला डोटी सुर्खेत दैलेख र कैलाली जिल्लाबाट पनि भक्तजनहरु जामा पुग्ने गर्दछन् ।

केदारनाथको पूजाआजा गर्दा अन्न , सन्तान ,पशु लाभ हुने ऐतिहासिक विश्वास रहि आएको छ। यो विशुद्ध रुपमा शाहाकारी देवता भएकाले दुध र घ्युलाई प्रसादको रुपमा ग्रहण गरिन्छ। यो मेलामा लामो समयदेखि टाडिएका आफन्तजन साथीभाइ दिदीबहिनी बीच पनि आपसी भेटघाट हुने भएकाले यो मेलालाई अझ आपसी सद्भावको मेलाका रुपमा पनि लिने गरिएको छ ।

गठन भएको समितिले जामामा हुने मेलालाई शान्त र मर्यादित रूपमा सम्पन्न गर्नका लागि काम गर्ने बताइएको छ। मेलालाई शान्तिपूर्ण बनाउन सुरक्षा संयन्त्र परिचालन गर्नेदेखि अन्य व्यवस्थापनका कार्यसमेत समितिले गर्ने समितिका संयोजक महेश जैसीले जानकारी दिनुभयो। मेलालाई सफल र भव्य बनाउन सबैको साथ र सहयोग आवश्यक रहेको भन्दै जैसीले सबैले सहयोग गर्नुपर्नेमा जोड दिनुभयो साथै मेला भर्नका लागि सबैलाई आमन्त्रण पनि गरिएको बताइएको छ ।